मेजवानी आता नवीन जागी

आमच्या नवीन जागी आम्ही आपली वाट पाहत आहोत.

www.mejwani.in

स्थलांतर

स्थलांतर

भरवा मिरची

भरवा मिरची 

साहित्य-

1)जाड हिरव्या मिरच्या -5

१)बेसन-४ टेबल स्पून 

२)शेंगदाणा कूट- २ टेबल स्पून

३)आल-लसून पेस्ट-१ टी स्पून

४ )ओवा-१/४ टी स्पून

५)जिरे-१/२ टी स्पून

६)हळद-चिमूटभर

७)चवीनुसार मीठ

८)गरजेनुसार तेल

९)बारीक चिरलेली कोथांबीर

कृती-

१)प्रथम मिरच्या धुवून  ,पुसून घ्याव्यात व त्यांना मधोमध उभा काप द्यावा ,जास्तीच्या बिया काढून टाकाव्यात 

२)आता एका बाउलमध्ये बेसन,शेंगदाणा कूट,जिरे,ओवा,हळद व चवीनुसार मीठ घालून मिश्रण हाताने एकजीव करून घ्यावे ,आता यातच  एक पळीभर तेल घालून मिश्रण पुन्हा एकजीव करून घ्यावे व यातच बारीक चिरलेली कोथांबीर घालावी .

३)वरील तयार मिश्रण मिरच्यांमध्ये नीट दाबून दाबून भरून घ्यावे .

४)आता एका कढइत तेल गरम करावे व त्यात ह्या मिरच्या मसाला भरलेली बाजू वर राहील अश्या पद्धतीने ठेवावे .मिरच्या ह्याप्रमाणे दिसतील –

५)आता कढइत थोड्याश्या पाण्याचा हबका मारून झाकण ठेवावे साधारण ५ मिनिटातच एक बाजू झालेली असेल तेव्हा बाजू उलटून घ्यावी व पुन्हा किंचितश्या पाण्याचा हबका मारून झाकण ठेवावे व दुसरी बाजू झाल्यावर आच बंद करावी व मिरच्या सर्व्ह कराव्यात .

टीप-

१) मिरच्यांमध्ये भरल्यानंतर मिश्रण  उरले  तर त्याचे मुटकुळे बनवून तेही मिराच्यान्सोबतच कढइत ठेवावे ,छान लागतात .

 

वरण चकोल्या (चिखल्या )

वरण चकोल्या (चिखल्या )

साहित्य-

१)तूर दाल-१ कप

२)गव्हाची कणिक -२ कप

३)ओवा -१/२ टी स्पून

४)चवीनुसार मीठ

वरण चकोल्या (चिखल्या )

फोडणीसाठी-

१)जिरे-मोहोरी-१ टी स्पून

२)लसून-३ ते ४ पाकळ्या बारीक चिरून

३)हिरव्या मिरच्या-३ बारीक चिरून

४) १ लहान टोमाटो -बारीक चिरून

५)हळद-१/८ टी स्पून

६)कढीपत्ता -५ ते ६ पाने

७)गरजेनुसार तेल 

८)सजावटीसाठी कोथांबीर 

कृती-

१)प्रथम एका प्रेशर कुकरमध्ये पाणी गरम करत ठेवावे ,पाणी गरम झाले कि त्यात धुतलेली तुरीची डाळ घालावी व झाकण लावून घ्यावे .

२)आता कणकेत ओवा आणि थोडेसे मीठ घालून कणिक मळून घ्यावी ,तयार कणकेचे समान भाग करून घ्यावेत
 .तयार कणकेची थोडी जाडसर पोळी लाटून घ्यावी व शंकरपाळे कापून घेतो तसे कापून घ्यावे ,ते ह्याप्रमाणे दिसेल.

चकोल्या

३)आता कुकरची वाफ काढून घ्यावी व झाकण उघडून त्यात ह्या कापलेल्या चकोल्या घालाव्यात व पुन्हा कुकरचे झाकण बंद करून १ शिट्टी करून घ्यावी व आच बंद करावी व वाफ निघू द्यावी

४)आता एका छोट्या कढइत किंवा वघारीयात तेल गरम करण्यास ठेवावे ,तेल गरम झाले कि त्यात जिरे-मोहोरी चांगली तडतडू द्यावी ,यानंतर त्यात कढीपत्ता , बारीक चिरलेला लसून,हिरवी मिरची व टोमाटो घालावा तसेच हळदही घालावी व हि तयार फोडणी वरण-चकोल्यांवर घालावी  व १ ते २ मिनिटात आच बंद करून यावर बारीक चिरलेली कोथांबीर घालावी व वरून साजूक तूप घालून चकोल्या सर्व्ह कराव्यात .

टीप-

१)यात पाण्याचे प्रमाण नेहमीच्या वरणासाठी ठेवतो त्यापेक्षा  जास्तच ठेवावे .

२)चकोल्यात साजूक तूपाएवजी लोणच्याचे तेल घालून खाल्ले तरी छान लागते .
 

 

साबुदाणा वडा

साबुदाणा वडा
साहित्य-
१)भिजवलेला साबुदाणा -सव्वा कप
२)उकडलेले बटाटे -२ मध्यम आकाराचे
३)शेंगदाण्याचा कूट-२ ते ३ टेबल स्पून

साबुदाणा वडा

४)लाल तिखट-दीड टी स्पून
५)लिंबाचा रस -दीड टी स्पून
६)कोथांबीर-बारीक चिरलेली
७)चवीनुसार मीठ
८)तळण्यासाठी तेल
चटणीसाठी –
खवलेले ओले खोबरे -१/२ कप
२)हिरव्या मिरच्या -२ (लहान )
३)दही-३ टेबल स्पून
४)कोथांबीर-१/२ कप
कृती-
१)साबुदाणा खिचडीच्या रेसेपित दिल्याप्रमाणे साबुदाणा भिजवून घ्यावा .साबुदाणा खिचडीच्या रेसेपिसाठी इथे –क्लिक करा .
२आता उकडलेला बटाटा किसून घ्या व यात भिजवलेला साबुदाणा घालून नीटएकजीव करून घ्यावे वयातशेंगदाण्याचा कूट ,लाल तिखट,लिंबाचा रस,बारीक चिरलेली कोथांबीर व चवीनुसार मीठ घालून नीट एकजीव करून घ्यावे .
३)तयार मिश्रणाचे मध्यम आकाराचे गोळे तयार करावेत व त्यांना हलक्या हातानी दाबून चपटा आकार द्यावा व गरम तेलात सोनेरी रंगावर तळून घ्यावे
व गरमागरम वडे ओल्या खोबर्याच्या चटणीसोबत सर्व्ह करावेत .
४)चटणी तयार करण्यसाठी -चटणीचे सर्व साहित्य घेऊन मिक्सरमधून फिरवून घ्यावे व वड्यांसोबत चटणी सर्व्ह करावी .

]/

साधी खिचडी –

साधी खिचडी –

साहित्य-

१)तांदूळ-३/४ कप

२)मूग दाल-१/२ कप

३)लसून-४ ते ५ पाकळ्या बारीक चिरून

४)हिरव्या मिरच्या -३ बारीक चिरून

mug dal khichadi

५)जिरे-मोहोरी-१ टी स्पून

६)हळद-चिमुटभर

७)कढीपत्ता -४ ते ५ पाने

८)गरजेनुसार तेल

९)चवीनुसार मीठ

१०)सजावटीसाठी कोथिंबीर

कृती-

 

 

 १)प्रथम एका प्रेशर कुकरमध्ये तेल गरम करत ठेवावे ,तेल गरम झाले कि त्यात जिरे-मोहोरी घालून चांगली तडतडू द्यावी त्यानंतर कढीपत्त्याची पाने घालावीत तसेच बारीक चिरलेला लसून व हिरव्या मिरच्या घालून परतून घ्यावे व हळद घालून त्यात गरजेनुसार पाणी घालावे.

२)पाण्याला एक उकळी येईल तितक्यात दाल-तांदूळ एकत्र करून धुवून घ्यावेत ,पाण्याला एक उकळी आल्यानंतर त्यात धुतलेले दाल-तांदूळ घालावेत तसेच चवीनुसार मीठ घालून कुकरचे झाकण बंद करावे

३)साधारण २ शिट्ट्या झाल्यानंतर आच बंद  करावी व इक थोड्या वेळात झाकण उघडून त्यात बारीक चिरलेली कोथांबीर घालावी व गरमागरम खिचडी लसून-शेंगदाण्याच्या चटणी सोबत किंवा फक्त वरून गावराणी तूप टाकून खावी .भरली वांगी सोबतही  खिचडी छान लागते

 

आलू पराठा

आलू पराठा

साहित्य-

१)उकडलेले बटाटे -४ ते ५ (मध्यम आकाराचे )

२)गव्हाची कणिक -३ कप

३)हळद-चिमुटभर

४)धणेपूड-१ टी स्पून

५)लाल तिखट-२ टी स्पून

६)चवीपुरते मीठ

७)गरजेनुसार तेल

८)कोथिंबीर

९)आल-लसून पेस्ट-१ टी स्पून

कृती-

१)प्रथम कणकेत थोडे मीठ व तेल घालून कणिक घट्टसर मळून घ्यावी .

२)उकडलेले बटाटे किसून घ्यावेत .एका कढइत तेल गरम करावे तेल गरम झाले कि त्यात आल-लसून पेस्ट ,हळद,धणेपूड,लाल तिखट व किसलेले बटाटे घालावेत व चांगले एकजीव करून घ्यावे

आता यात चवीनुसार मीठ घालावे तसेच बारीक चिरलेली कोथिंबीर घालून एकजीव करावे व मिश्रण थंड होण्यासाठी ठेवावे.

३)आता कणकेचा लहान गोळा घ्यावा व छोट्या पुरिएवढा लाटून घ्यावा व यात तयार  बटाट्याच्या मिश्रणाचा एक गोळा मध्यभागी ठेवावा व हा गोळा पूर्णपणे झाकला जाईल यारीतीने पुरीचे तोंड बंद करावे .

४)आता ह्या गोळ्याला थोडे पीठ लावून हलक्या हाताने पराठा लाटून घ्यावा व गरम तव्यावर तेल सोडून शेकून घ्यावा .गरम गरम पराठा दही किंवा लसून-शेंगदाण्याच्या चटणी सोबत सर्व्ह करावे.

 

 

कैरीची भाजी

साहित्य-

१)कैरीच्या फोडी-१/२ किलो

२)किसलेला गूळ-४ ते ५ टेबल स्पून

३)अख्खे धणे-१ टी स्पून

४)लाल तिखट-१ ते दीड टी स्पून

५)लसूण पेस्ट-१ टी स्पून

६)तमालपत्र-१

७)जिरे-मोहोरी-१ टी स्पून

८)चवीनुसार मीठ

९)गरजेनुसार तेल

१०)सजावटीसाठी कोथिंबीर

कृती-

१)सर्वात प्रथम एका भांड्यात पाणी गरम करत ठेवावे ,पाणी उकळले कि त्यात कैरीच्या फोडी घालाव्यात व साधारण १० ते १५ मिनिट उकडू द्याव्यात .कैरीच्या फोडी नीट शिजल्या कि नाही हे बघण्यासाठी एक फोड पाण्यातून बाहेर काढून दाबून बघावी ,मऊ शिजली असेल तर आच बंद करावी व ह्या कैरीच्या फोडी एका चाळणीत    काढाव्यात व निथळत ठेवाव्यात .

२)आता एका काढईत तेल गरम करत ठेवावे ,तेल गरम झाले कि त्यात तमालपत्र घालावे तसेच जिरे-मोहोरी घालून  चांगली तडतडू द्यावी यानंतर त्यात अख्खे धणे घालावेत यानंतर लसूण पेस्ट तसेच हळद व लाल तिखट घालून नीट परतून घ्यावे आता यात कैरीच्या उकडलेल्या फोडी घालून परतून घ्यावे .

३)कैरीच्या फोडी नीट परतून झाल्यावर त्यात चवीनुसार मीठ घालावे व परतून घ्यावे .आता यात किसलेला गूळ घालून नीट एकजीव करून घ्यावे .भाजीला आता थोडे पाणी सुटल्यासारखे वाटेल ,भाजी पुन्हा एकदा नीट परतून घ्यावी म्हणजे गूळ सर्व भाजीला लागेल .साधारण ५ ते ७ मिनिटात आच बंद करावी व बारीक चिरलेली कोथिंबीर घालून हि भाजी तोंडलावणी म्हणून सर्व्ह करता येईल .

टीप-

१)आजकाल बाजारातच कैरीच्या फोडी विकत मिळतात त्य आणाव्यात किंवा जर कैरीच विकत आणली तर ती धुवून नीट पुसून मग कोयत्याने तिच्या मध्यम आकाराच्या फोडी कराव्यात .

२)कैरीच्या फोडी आधीच उकडलेल्या असल्यामुळे त्यांना जास्त शिजवू नये.

इडली भुर्जी

 

साहित्य-

१)उरलेल्या इडल्या-३ ते ४

२)१ मध्यम आकाराचा कांदा -बारीक चिरून

३)१लहान टोमॅटो-बारीक चिरून

४)आल-लसूण पेस्ट-१ टी स्पून

५)जिरे-मोहोरी-१ टी स्पून

६)लाल तिखट-१ टी स्पून

७)धनेपूड-१/२ टी स्पून

८)चवीनुसार मीठ

९)गरजेनुसार तेल

१०)सजावटीसाठी कोथिंबीर

कृती-

१)प्रथम इडल्या हाताने नीट कुस्करून घ्याव्यात .आता एका काढईत तेल गरम करत ठेवावे तेल गरम झाले कि त्यात जिरे-मोहोरी तडतडू द्यावी ,कांदा घालून चांगला गुलाबीसर रंगावर परतू द्यावा मग यांत टोमॅटो घालून परतून घ्यावे तसेच आलं-लसूण पेस्ट घालावी  .

२)हळद,धनेपूड,लाल तिखट घालून पुन्हा चांगले परतून घ्यावे आता यांत कुस्करलेल्या इडल्या घालाव्यात व नीट एकजीव करून घ्यावे .इडलीत आधीच मीठ असते तेव्हा थोड बेतानेच मीठ घालावे व परतून घ्यावे साधारण ३ ते ४ मिनिटांत आच बंद करावी व बारीक चिरलेली कोथिंबीर घालून डिश सर्व्ह करावी .

मिरच्यांची भाजी

साहित्य-

१)जाड हिरव्या मिरच्या-५ ते ६ आडव्या उभ्या चिरून

२)लसूण-५ ते ६ पाकळ्या बारीक चिरून

३)जिरे-मोहोरी-१ टी स्पून

४)शेंगदाणा कूट-दीड टेबल स्पून

५)चवीनुसार मीठ

६)गरजेनुसार तेल

७)कोथींबीर

कृती-

१)एका कढईत तेल गरम करत ठेवावे ,तेल गरम झाले कि त्यात जिरे-मोहोरी घालून चांगले तडतडू द्यावे आता यांत बारीक चिरलेला लसूण घालावा तसेच चिमूटभर हळद घालून बारीक चिरलेल्या हिरव्या मिरच्या घालाव्यात व परतून घ्यावे .

२)मिरच्या चांगल्या परतून झाल्यावर त्यात वाटीभर पाणी घालावे व चवीनुसार मीठ घालून ढवळून घ्यावे. पाण्याला  उकळी फुटल्यानंतर त्यात शेंगदाणा कूट घालून भाजी ढवळून घ्यावी व मिरच्या मऊसर् शिजल्यावर आच बंद करावी व बारीक चिरलेली कोथिंबीर घालावी व हि भाजी तोंडलावणी म्हणून सर्व्ह करावी .

टीप-

मिरच्या चिरल्यानंतर त्यातील बिया काढून टाकाव्यात .